Rom 9 | KMG | STEP | No Kristore ŋiczi burec mi ehuc dâŋ jâmbomac mupe mananiŋ. Tiri Mârozi maŋnane batamaehame mana-jâmbâŋkehuc ŋazape:

Romans 9

Paulo e Judaŋic âgofâcne jaŋere bušâic manawec

1 No Kristore ŋiczi burec mi ehuc dâŋ jâmbomac mupe mananiŋ. Tiri Mârozi maŋnane batamaehame mana-jâmbâŋkehuc ŋazape: 2 No busâqoc fârine manahuc maŋnane wemo afecne fârorockeekac. 3 Judaŋic âgofâc-nane, soctofafâc-nane hâcne, jaŋere erâ no nahac Kristore sacmaŋkonec wawahare sâcne afeckezapo. 4 Jaŋe hâcne Israe ŋic, eme Anutuzi fuŋfuŋfâc-ticne bacjopawec, ehuc tâpiri tatamac-ticne jowatuwec. Erâ jaŋehec šâšâfic erâ sâcmutâc dâŋ mufua-jarewec â mai ecnehuc juniŋte hatane jowatuwec. Erâ wâc biŋedâŋ jazawec. 5 Á mimiŋnefâc-jeŋic jaŋe mitire fuŋqizecne jumbiŋ. Eme Kristozi ŋicsahac rohuc fuawec i jaŋere guruo fuawec. Wiac sasawa irec Wofuŋ jukac, Anutu hâcne, e mumuteŋheczi mumuteŋhec jurašihuc juzejec sanaŋ. Jâmbomac.

Mitihec jaŋe Anuture ŋicfâc

6 Wiac iŋuc fuawec irec Anuture dâŋ dodocne ewec mi muzo. Israeraonec fuambiŋ jaŋe Israe ŋic fârine ninic mi efârembiŋ. 7 Á Abrahamte tofafâc jaŋe ɋâricfâc-ticne fârine wâc mi efârembiŋ. Eme irec hâcne dâŋ šiŋuc âzâcnekicne: “Isakare ɋâricfâc jaŋe sawa gore biŋe eniŋmu.” 8 Dâŋ irec fuŋne šiŋuc fokac: Sahaczi Abrahamtao fuambiŋ sâc Anuture ŋicfâc mi efârembiŋ, biŋedâŋko fuakicne jaŋe sawa Abrahamte ɋâricfâc fârine embiŋ. 9 Biŋedâŋ kecšiŋuc mukicne: “Jara moc tarame Sarazi motec rorâ bajuhame mocwâc warepemu.” 10 Erâ i sawa mâcne, Rebekarao sâc ijaha fuawec. E mimiŋne-nâŋec Isaka ehec juhuc motec jajahec kiwec-jofawec. 11 Eme motec jahe mi fuahuc wiac biaŋne me sâqocne mi ehapire Anutuzi jahere šiŋuc âzâcnewec: “Hahaczi ɋare kiŋaŋ qazejec.” 12 Ine Anutu mumupaŋ-ticne sanaŋkeocte manasuhuc motec juju-jekicte mâcne, e jahacne maŋte ro bârâwiŋ ejactehuc dâŋ i muwec. 13 Irec dâŋ moc šiŋuc hâcne fokac: “No Jakobore enarewec â Esaure takicnuwec.”

Anutu e juju bapa-nâŋecte mâcne, buuruc-ticnere ehâmo-nâreekac

14 Eme irec weniŋuc muzo? Anutu erao guriŋ bapa hehesicne moc fokac me? I aric kereŋne. 15 E Mose dâŋ šiŋuc âzâcnewec: “No ŋic moc akickezo murâ akickepemu â ŋic moc buuruc ecnezo murâ ecnepemu.” 16 Irec ŋicmaŋte me ŋic eebapare mi muzo, Anutu buuruc-ticnere sawa muzo. 17 Anutuzi Farao dâŋ âzâcnewec, irec miti papiao šiŋuc qâreŋkekicne: “No gorao tâpiri-nane bataniŋkepe šâŋe biŋe-nane mâreŋ sâc raocte muhuc âkendâŋgupo hâcne.” 18 Eme irec Anuture šiŋuc manazo: E ŋic moc akickezo murâ akickeocmu â moc e maŋne bâzickezo murâ bâzickeocmu. 19 Eme ŋifecne šiŋuc mecne nazacmu: “Anutu e ŋic nâŋâcne wemocte maname sâqoreekac? E wiac moc ezo mume ŋiczi aka hehecne i mi fokac.” 20 Ŋic go wemogere Anuture dâŋ mucmu? Kušizi wemocko kuzi bapa šiŋuc âzâcneocmu: “Go wemocte sâc iŋucne bacnumeŋ?” 21 Me kuši bapa e afe izia kuši gâcne ŋic jaŋere biŋe â gâcne bec qâto jaŋere biŋe bame sâqoreocmu me?

Miti runezi râpene embiŋ

22 Eme Anutu e kuši kimbeŋ-ticnere biŋe, šâhecko qanšaŋ-joparâ behec-jopaocte maname fokac, kuši i jaŋerao šika bâfuahuc tâpiri-ticne bataniŋkeocte sifu bumâteŋ-ticnere erâ jâbu ejare warehuc juekac. 23 Erâ ŋifecne kuši buuruc-ticnere biŋe, juku eri tatamac-ticnao biric-jopaocte maname fokac, kuši i jaŋerao eri aŋac mâriri hejareocte bacjopa juekac. 24 Eme Judaŋic sawa mâcne, qâpuc mâmâc kuši buuruc-ticnere biŋe enaŋte hefârec-nâpoekac. 25 Eme irec porofete Hoseare papiao dâŋticne šiŋuc fokac:

“Ŋicguru mi rucjopapo jaŋe `nore ŋicfâcƷ mucjopapemu,
â biŋemâc juwec e šâŋene `joroc-naneƷ mucnepemu.”
26 “Eme `ŋoŋe nore ŋicfâc aricneƷ ŋazakicne,
mâreŋ ira wâc šâŋe-jeŋic `Anutu jujunere naru motecfâcƷ fuaocmu.”
27 Erâ Jesajazi hahaŋne bahuc Israe ŋic jaŋere šiŋuc muwec wâc: “Israe ɋâricfâcne jaŋe hâwecmecko moŋgeŋ fokac irec sâc bâfuazo murâ bâfuaniŋmu, eme sifu uuc šanšaŋne sawazi biaŋkeniŋmu.” 28 Wofuŋ e mâreŋko dâŋticnere fârine ɋeŋnea bâfuame fideteŋ efâreocmu. 29 Jesajazi findaŋdâŋ moc šiŋuc hâcne muwec:

“Sambaŋ momori jaŋere Wofuŋ e ŋicukic
moc mi getâc-jopa-nâreme muzac,
ine Sodom jaŋere sâc bâfuanšapeŋ,
â Gomora jaŋe iŋucne enšapeŋ.”

Judaŋic jaŋe tiŋke biaŋ eniŋte eipiembiŋ

30 Eme ši weniŋuc muzo? Kecšiŋuc: ŋic qâpuc tiŋke biaŋ eniŋte mi fotariembiŋzi tiŋke biaŋ embiŋ, mamanasiŋte tiŋke biaŋ embiŋ hâcne. 31 Á Israe ŋic sâcmutâc dâŋ reŋkehuc tiŋke biaŋ eniŋte fotariembiŋzi sâcmutâc dâŋ bâmâmâckembiŋ. 32 Wemocte? šiŋucte: Jaŋe mamanasiŋte mâcne, mâc juju bapa-jeŋicte tiŋke biaŋ eniŋte mumbiŋ. Ehuc hatao qânâ fowec ira kike-jeŋic hezumbiŋ. 33 Kecšiŋuc hâcne qâreŋkekicne fokac:

“Manakic, no Zioŋ haeo qânâ moc râekopac
ira kike-jeŋic hepirickeniŋmu,
â buse ŋeŋene moc hekopac ira heariweniŋmu.
Eme moczi e manasiŋkeocmu ine mi qurutuaocmu.”